巴寨游记
巴寨在丹霞山西南10千米，俗称大石山。隔锦江相对，总面积40多平方千米，由锦水、田园、村落及仙山琼阁群山组成，“大丹霞”丹霞地貌的核心区。这里地域深广、山势高峻。在全区27座海拔400米以上山峰中，该区独占20座，最高峰巴寨海拔619米，是丹霞山的“珠穆朗玛”。巴寨游览区的景点多在仙山琼阁群山内，由姐妹峰、观音石、朝天龙到五仙岩、田螺寨，由茶壶峰、巴寨、燕岩到蜡烛峰、扁寨、平头寨，由碧水田园到飞花瀑布，其景观景物的珠连玉串，自然风光的绚丽多姿，山寨栈道的陡峭奇险，流泉飞瀑的壮丽神奇，是丹霞山最具魅力、山体景观资源精华、文化脉络所在，集观光、探险、休闲度假、野营、科考于一体的游览区。
巴寨位於丹霞山大石山景區內，絕壁聳立，一山拔地而起，氣勢不凡。山高海拔６ｘｘ米，是丹霞山景區內的最高峰山上分為三級平台，密林山頂、山腰絕壁棧道、下層岩穴可供人居住。經歷代土王、盜賊修繕，在半山腰懸崖上山洞中建有住所、兵營、倉庫、水槽、蓄水池等，攀登巴寨唯一的通道是一條在陡壁上開鑿、約廿米高、僅可供一人上下的天梯，地勢之險峻使其成為粵北戰亂時代著名的天然堡壘。
開發巴寨睇黎勢在必行，現已鋪好了縣城至山腳暖坑村的公路，只餘下登山小道尚未動工。年初丹霞之旅後已打算在其開發為景點之前一遊，一睹原始風味的巴寨，更可省回入場費一筆！
＠填飽個肚就買午餐乾糧，竟然有蕉食，十分好。一切準備好就安排交通去暖坑村，如果搭公交，大巴去仁化１３蚊位，仁化去夏富約２蚊位，之後仲要行入去暖坑村，太繁複費時既選擇…於是我地嘗試包架車去暖坑村，多番嘗試後以２７０來回成交，１１人一車剛剛好，計落平過公交，仲方便廿倍。
＠行走ＸＸＸ國道，經丹霞山正門、仁化懸再轉入夏富暖坑，全程個半鐘，１１點半到達暖坑村停車場。落車時下著毛毛細雨，還不算太大影響，大家收拾收拾行裝，司機大佬見我地個個都背著大包包，便提議我我可以放低Ｄ行裝登山，十分不錯既建議，包車又一好處。＠時間１１４０，減磅後終於起行，呢段路無人識行…只得司機大佬一句話「跟住最大條果條路去就係架啦」，點知開波第一分鐘即時行錯路，走左上正面的小路…＝＿\＝
＠幸好村民見狀就立刻點條正路我地行，再出發…停車場左邊原來勁大個巴寨入口牌…Happy…睇資料上落山一趟大約要五個半鐘，以我地爛玩既習慣唔行快Ｄ分分鐘入黑都返唔到黎。大隊一直依著田間小徑前行，穿過一個柚子園在後方開始上斜。
＠一路大方向推進，不時見到有垃圾遺留在地上，所以都頗肯定路是正確的。穿梭於半山的林木之中，高速推進難免會扯爆部份隊員。
＠唔緊要，齊齊食隻蕉補充體力。
＠１２３０脫出樹林區，絕壁聳立的巴寨驚現放正前方！
＠太惡的山勢，全隊駐足觀賞了良久，謀殺了無數記憶體。
＠接走開揚的山脊，１３００到達巴寨的絕壁之下。頭上是一塊弧形的大直崖，直崖之上可以見到一個懸壁平台，正是第一台階岩穴所在，亦係巴寨野營的主場。
＠大伙兒沿著壁下的石階上行，十分大路，未幾左方會有條小支路，可以沿８０度斜壁石階上攀到一觀景石台，時間關係暫且不理。
＠繼續向天梯前進，登上一道百多級的石階，此時茶壼峰亦出現在右方，由多條山柱組成石峰，造型比巴寨更可惡，但還未到達經典角度。續行之時上方傳來一陣陣唱遊之聲，隊員們奇怪之際前方便迎頭來了一學生小隊，由老師帶領著來巴寨遠足兼執垃圾！中國政府近年都推動環境教育的確係有一手。
＠終於到達一線天，遠望盡處一道木梯沿石峽而上，正是天梯所在。
＠率先試攀，雖然木條都是鬆動地卡在石洞之中，稍有不受力之感，下段更是成９０度垂直之勢，都唔好話唔lup水…
＠但經過修葺後既天梯比想像中安全多了，起馬唔會好似網上睇到既相咁，半米先有一條木級＝＿\＝
＠大伙兒一個接一個上攀，攀越天梯就會到達第一層石穴所在。影相既時候突然從身後傳來驚叫聲，緊接崖下一連串撞擊聲＝＿＝！回頭一望，原來ｋｋ個水壼跌左落崖…真係嚇兩死…人跌落去真係收得工，至於個水壼跌在天梯下平地旁邊的叢水，再過少少就係陡峭的斜坡，睇黎大家都無乜意欲去執，都係放棄吧啦。
＠天梯的上方正是夜鷹石台，旁邊就係廿米直崖，行出去影相都lup水到癲，仲要坐上去就真係…攬雀尾…
＠搞左一輪，終於全員登上第一層，平台處於峭壁之間，外面一片虛空，行出兩步都嚇鼠。
＠但風景黎講就真係絕讚，雖然煙雨矇矓，但遠觀丹霞景區內多座奇峰聳立，清煙環繞，亦係別有一番風味。
＠而主打既當然仲有正面的茶壺峰，此時其惡貫滿刑既茶壼造形驚現，實在係太奇特的一座山峰！再下望剛剛過而不登的觀景石台，竟然見到頭先班清潔小組上左去！嘩好睇到傻，唔得，一陣返轉頭都要一登！
＠獵影一輪後繼續前進，路過兩三個石室，亦即係傳說中既野營地點。
＠石室間隔都十分之寬敞，環境乾爽，落大雨都可保不濕，又面對茶壺峰特優景致，確係一個旬盤，唯一係石室外就係萬劫不復既深淵，夜晚無camp fire 照一下差錯腳就Happy。
＠石室的牆上有許多小石穴，放置了各式各樣的柴米油鹽供旅人使用，真貼心。參觀完樓盤繼續向上層進發，出現一左轉往上分叉路，選走往上的路，點知上到去竟發現石製芧廁乙個，對著１８０度大好河山擺堆係幾咁豪情！落花隊員都忍唔住要來一客，可惜最後有心無力無功而還。＠離開芧廁返回叉路位繼續前進，中途路過一個可能係傳聞中既水源點，竟然係一個水量微弱的青苔流瀑…如果呢個係唯一水源既話，我諗黎野營樂既朋友仔都係自備多ｄ煮食水會好ｄ。
＠之後左邊會有一間荒廢石屋，外面睇都幾好feel，但入面都係擺堆既聖地，不宜入內一探…屋前又有叉路，無視右方小路繼續直線推進，路況又有料到，再次走進懸壁棧道。
＠未幾出現一狹窄的石門，僅僅容許一個人通過，重裝之下就要磨爆袋先過到。
＠過門後一段爛鬼泥路，但係險象環生絕不容少觀，因為路旁雜草後便是千丈絕崖，全程最陰險位，就在此間，路過之時就算要硬食荊棘都不可輕舉莽動！
＠再來便是鴨走第一棧道，區區幾米難唔到一眾隊員。
＠時間１４２０，大家都開始覺得餓，不住找好地方大休午餐，就起呢個時候剛剛好到達一環形大廳，左邊有大量石台可以作大休之用。
＠大廳中央便是網上看到的「真．鴨走棧道」，驟眼睇棧道後段十分狹窄，而且外傾向下方絕崖十分嚇人！！一陣都係睇定ｄ先，而家就梗係醫左肚先啦！乾糧大休計劃～
＠午餐後同落燒試探棧道，在得一米高的棧道中烏身前進，完全抬唔起頭做人。小心ｄ行完全無危險，去到轉彎位，開頭睇到後段既不明朗外斜位原來係一條康莊大道，可以跑添呀！！
＠得知這裡十分安全後就大隊一齊玩鴨走過來～
＠在這邊影鴨走中既隊員及棧道外面的絕崖，嗯…其實都幾嚇人…
＠全員安全到著，齊齊起跳飛躍一個。
＠本來打算離開石廳繼續前行，但再行無耐就下起雨來，時間又唔多夠，於是決定就此打住，原路折返。
＠返到去石廳集齊隊員就快步離開了，好快回到上頂的分差路，決定兵分兩路，一路先行下降，在天梯下待機。另外攻頂小隊五人眾就急步穿起叢森小徑，向山頂進發。
＠去到傳說中臨頂的險梯，嗯…果然有ｄ料到，８０度既石級加上最愛的菁苔。
＠上攀之時無辦法唔對旁邊既扶手石洞愛不釋手，就算裝滿哂污泥青苔水…都係咁隊隻手落去握到實一實。
＠登臨石梯之癲，這裡的風景絕對無令人失望，外面正正對著茶壼峰，而且是以俯瞰的角度！石梯頂後面發現類似傳說中首領浴池既物體，對著如此景致浸浴都真係幾嘆…當然現在都已變成了死水污泥池了。
＠資料所得巴寨山頂全為健康密林，攻頂小隊都十分有覺悟地決定一遊，這裡左右都有路，我地選走右路，快步在叢林中穿梭，期望可以到達巴寨的最高點，可惜我地狂奔了幾個字，除了林還是林，完全辨別唔到那裡是最高點，時間所限最後唯有在一個疑是山頂的地方合個照，之後便原路逃脫～
＠再一次下降險梯，比上攀還要驚險＝＿＝一個一個慢慢典落黎…
＠回到叢林小路，快步趕回先發隊伍，點知有叉路旁竟發現傳說中的「又一村」既位置，原來就係一開始見到的石屋所在位置，在路旁大石上刻了「又一村」的字樣，繞到石後還有一「天然台」，擺放著石棋盤呢。
＠探完又一村又快步前進，好快就返到去天梯頂既位置，見到先行隊員經已全數下降完成，在天梯下等待我地，真係快手。
＠考～合流完成繼續撤出，這時又下起雨來了…路過今早沒有一登的天然觀景石台，係時候做野。
＠爬上濕滑的石級登上這個菇狀的石台，風景絕對係３６０開揚。
＠雨中的丹霞景區輕煙環繞，多了一份淒美，或者晴天的丹霞亦有所不及。
＠完成最後的輕登任務，大伙兒繼續原路折返，１７００回到暖坑村，今早１１４５出發，總計５小時１５分鐘完成巴寨之旅，快！
页:
[1]